SHAABAA Season 27 Core Pacific milangkat sa korona sa Division A

CEBU, Philippines — Ang Core Pacific Group mibuntog sa GMall of Cebu, 51-45, sa deciding game sa ilang best-of-three finals aron paglugwa nga kampiyon sa Division A sa Sacred Heart Ateneo Alumni Basketball Athletic Association (SHAABAA) Season 27 niadtong Dominggo, Agosto 18, didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Sa wala pa gilabni ang korona, ang Core Pacific nag-agi usa og malisud nga dalan gumikan kay nabiyaan sila og nuybe puntos, 11-20 sa sayong bahin sa ikaduhang kuwarter.     Alkansi gihapon og sayes puntos sa halftime, 18-24, ang Core Pacific milusad og eksplosibong resbak aron pag-establisar og otso puntos nga bentaha, 36-28, sa naghinapos nga bahin sa ikatulong kuwarter. Ang GMall nakasikit ngadto na lang sa tres puntos, 38-41, apan mao na kadto ang katapusang nilang utong gumikan kay ang Core Pacific mipakita og igong katakos ug kadasig aron pagipsot ngadto sa sayes puntos nga kadaogan.

Si kanhi PBA star Joel Anthony Co maoy nangu sa Core Pacific uban ang double-double nga 13 puntos ug 12 ka rebounds. Gibayaw siyang Finals Most Valuable Player tungod sa maanindot niyang salida sa tibuok serye.

Way pagbahar ang kahait, si Co naglabngkob sab sa Mythical Five uban ang iyang teammates nga sila si Jeremy Ryan Huang ug Dave Lim, season MVP Derick Mangubat sa GMall, ug Nanding Lim sa Yangtze Ice.

Sila si Huang ug Dave Michael Ting mikuha sab og atensiyon bitbit ang 11 puntos matag usa ingon man ang big man nga si Dave Lim nga milangkat og 16 ka rebounds aron ipalaman sa iyang otso putnos.

"It was a hard fought battle. Both teams deserved to win this championship," matud pa ni playing team owner Afshin Ghassemi sa Core Pacific Group. "Among all my four championships, what makes this special is I get to share it with fellow alumni from other batches."

Ubos sa paggiya ni coach BJ Murillo, ang ubang mga miyembro sa Core Pacific champion team mao sila si Pierre Mella, Dennis Que, Mikel Sala, Glenn Sevilla, Andrew Po, Michael Jun Lim, Johannes Chua, Glenn Ocampo, ug Joseph Lo, nga maoy gipasidunggan nga Defensive Player of the Year.