Unom ka adlaw ang duwa matag semana hugot nga iskedyul  sa PBA Govs' Cup

CEBU, Philippines — Ang PBA miplastada og hugot kaayong iskedyul sa dihang ang liga mosikad sa ika-49 niining season karong Dominggo, Agosto 18, didto sa Smart Araneta Coliseum.   

Ang mga duwa ipahigayon sud sa unom ka adlaw matag semana sa unang buwan sa pasiunang komperensiya nga Governors' Cup.

Matud pa ni commissioner Willie Marcial nga gikan sa Martes ngadto sa Dominggo ang aksiyon nga masaksihan sa mga fans. Lunes lamang ang adlaw sa pahuway sa tanang teams. Gituyo kini sa PBA aron makapangandam sa duha ka dagkong internasyonal nga mga torneyo diin ang liga nagkupot og mahinungdanong papel.

Buot sa PBA nga tabangan ang Gilas Pilipinas sa ilang preparasyon alang sa 2nd window sa Asia Cup qualifiers ug ingon man giyahan ang San Miguel Beermen ug Meralco Bolts sa nilang partisipasyon sa ikaduhang home-and-away season sa East Asia Super League (EASL).

"Magiging six times a week na tayo because of Gilas and EASL," dason pa ni Marcial.

Duha ra hinuon gihapon ka duwa ang banatan matag adlaw. Mo-arangkada kini sa alas-5 sa hapon, samtang ang main game magsugod sa alas 7:30 sa gabii.

Duna hinooy kausaban sa oras sa Sabado kon ugaling adunay out-of-town game.

"Saturday kapag provincial game tayo, 6 p.m. ang laro. Pero kapag wala, ganun pa rin ang schedule natin para uniform, para dire-diretso na," dugang pa ni Marcial.

Giklaro hinuon ni Marcial ang ang unom ka adlaw nga iskedyul sa mga duwa sud lamang sa usa ka bulan.

"Yung six days a week kung hindi ako nagkakamali isang buwan lang naman, tapos balik ulit tayo sa dati," padayag pa ni Martcial.

Ang naandan nga iskedyul mabalik na sa normal atol sa playoffs diin ang mga duwa gitakda matag Miyerkules, Biyernes, ug Domingo.