CEBU, Philippines — Samtang nagmaya ang Pilipinas sa labing una niining bulawang medalya sa Paris Olympics pinaagi ni Carlos Edriel Yulo, pipila ka mga Cebuano ang nakatampo sa maong kalamposan ni Yulo, usa niini si coach Allen Aldrin Castañeda nga taga Barangay Hipodromo, Cebu City.
Si Coach Aldrin, ikaduha sa pito ka managsuon (ang iyang mga igsuon mga kanhi gymanasts, Allen Neil, Donna, Allen Keith, Darlene, Allen Basil ug Allen Miles) sa magtiayong kanhi Cebu gymnastic official Regina Castañeda ug Norberto Castañeda nga taga Barangay Hipodromo, Cebu City, naghilom-hilom lang bisan sa kadaogan ni Yulo.
Si Yulo nailhan og maayo ubos sa pagtudlo sa iyang kanhi Japanese coach nga si Munehiro Kugimiya sud sa taas nga panahon.
Apan sa wala pa si Munehiro sa gymnastics team sa Pilipinas, daan ng dunay tulo ka mga Sugbuanong coaches ang nakatabang kang Caloy, sila mao si Ricardo Otero, Joel Panugalinog ug si Allen Aldrin Castañeda.
“Kami rang tulo maoy nakagunit ni Caloy nga taga Cebu ang uban taga Manila na,” matud pang Panugalinog sa interview kaniya sa The Freeman/Banat News.
Giangkon hinuon ni Panugalinog nga mas nabansay og maayo si Caloy sa dihang si coach Munehiro na maoy nagtudlo kaniya.
Apan sa dihang nagkabuwag na silang Yulo ug Munehiro, si Castañeda maoy gitudlong mogiya kaniya sugod niadtong 2016.
Matud pa igsuon coach Aldrin, nga si coach Darlene sa laing interbyu sa The Freeman/Banat News, ang presidente sa Gymnastics Association of the Philippines(GAP) nga si Cynthia Carreon maoy midesisyon nga si coach Aldrin maoy motudlo kang Caloy kay mao kini ang rekomendasyon ni coach Mune.
“Thank you Lord!!!We made it!!!” post pa ni coach Aldrin Casteñeda sa iyang Facebook.
Kagabii, adlaw nga Domingo atubangon na sab ni Caloy ang men’s vault finals. — The Freeman