Bisitang Chinese miilog sa korona ni Vitor

CEBU, Philippines — Napakyas si Virgel "Valiente" Vitor  (22-4, 15KOs) pagdepensa sa iyang korona human ang garbo sa mga Bol-anon gi-knockout sa Chinese niining challenger nga si Yeerjialahasi Laayibieke (10-2, 7KOs) sa main event sa “Kumong Bol-anon 17” sa PMI Bohol Boxing Promotions niadtong Sabado, Hulyo 27, didto sa Bohol Wisdom School (BWS) Gym sa dakbayan sa Tagbilaran.

Tungod niini,  si  Laayibieke mao na karon ang naghari isip WBO Oriental super featherweight champion.

Agresibo na kaayo nga mi-ataki ang bisita gikan sa Beijing sa pagsugod pa lamang sa away. Iyang gitumba si Vitor sa ikatulong hugna sa wala pa gibombahan ang Bol-anon og mahait nga mga suntok sa ulo ug tiyan nga maoy nakapa-aghat ni reperi Danrex Joseph Tapdasan pag-undang sa away sa oras nga 1:05 sa ikalimang hugna.

Taliwala sa  makapakurat nga kapildihan ni Vitor, ang PMI Stable duna gihapoy daghang rason nga maglipay.

Si  Gerwin Asilo (9-0, 4KOs) mipatukay-ang ni Thai Surat Eaim Ong (19-6-1, 14KOs) sa ikaduhang hugna aton sakmiton ang WBO Oriental bantamweight belt, samtang si Althea Shine Pores (5-0, 1KOs) mipatigbabaw batok ni Maria Theresa Pinili (6-1, 2KOs) sa Iligan City aron langkaton ang Philippine Female light flyweight title.

Nagmalampuson sab ang ubang mga batos sa  PMI nga sila si "Sugar" Shane Gentallan, super flyweight contender Reymart "Cebuano Assassin" Tagacanao sa Carcar City,  ug WBO Asia Pacific Youth minimumweight champion  Christian Balunan sa Consolacion, Cebu.

Si Gentallan (10-1, 5KOs) mibuntog ni Ariston Aton (9-11-1, 5KOs) sa Cagayan de Oro City pinaagi sa unanimous decision, si Tagacanao (9-0, 7KOs) nagpabiling way pilde human gipukan si Renoel Pael (23-16-1) sa Matalum, Leyte pinaagi sa UD, samtang si Balunan (11-0, 7KOs) mipa-surender ni Dexter Alimento (13-14, 9KOs) sa Batangas City sa wala pa magsugod anbg ikatulong hugna.

Sa pasiunang kumbati, ang flyweight prospect sa ARQ Stable nga si Angelus "Pitbull" Pilapil (3-0, 2KOs) nanginahanglan lamang og 80 segundos aron patikangkangon si Kier Torregosa (2-6-2, 1KOs) sa sangka tali sa mga Sugbuanong boksidor.