ARQ Builders naghari sa MCBL Season X

CEBU, Philippines — Ang ARQ Builders mipiog sa Pure Fit Cebu, 85-82, aron langkaton ang tropeyo sa kampiyonato sa Metro Cebu Basketball League (MCBL) Season X niadtong weekend didto sa Cebu City Sports Institute gym sa Barangay Sawang Calero, dakbayan sa Sugbo.

Ang ARQ ni team owner Jason Arquisola naalkansi og sayes puntos, 16-22, apan mitagak og makabungog nga 30-11 nga bomba sa ikaduhang kuwarter aron kontrolahon ang duwa uban ang 52-37 nga labaw sa halftime.

Padayong nanginit ang Builders aron inaton ang ilang bentaha ngadto sa 19 puntos, 56-37, apan ang Pure Fit milusad og nagkayong resbak aron pagsikit niini ngadto na lang sa sayes puntos, 62-68, padung sa pinal nga 10 minutos sa aksiyon.

Mipakita hinoon og igong katakos ang ARQ taliwala sa presyur aron pag-ipsot ngadto sa tres puntos nga kadaogan.

Si Jude Betonio misidlak nga labing hayag sa kampo sa ARQ bitbit ang 16 puntos, duha ka rebounds ug tulo ka steals samtang si Tommy Spencer Ugsimar miamot og 11 puntos, usa ka rebound, usa ka ka assist, ug duha ka steals.

Sila si Carmelo Cabalhug, John Elmer Villabrille, Ian Ortega ug Ajing Dimataga dako sab og naambag human nagkumbinar og 32 puntos, samtang si Jose Miguel Tabaloc miamot og siyete puntos, lima ka rebounds, ug duha ka blocks alang sa ARQ.

Si Jeff Michael Gudes maoy nangu Pure Fit uban ang 24 puntos, pito ka rebounds, unom ka assists, ug duha ka steals. Si Keanu Ray Limana mihipos og 15 puntos ug lima ka rebounds samtang si Acer Go mikadlit og 14 puntos, pito ka rebounds, ug duha ka assists sa pilderong kawsa.