PYFBA U16 ballers kampiyon sa MARCA Summer League

CEBU, Philippines — Ang mga pambato sa Professional Youth Fellowship Basketball Advocacy (PYFBA) milugwa nga kampiyon sa Under 16 division sa Metropolis Athletes Referees Coaches Association (MARCA) Summer League 2024 didto sa Cebu International School (CIS) gym  sa Barangay Pit-os, dakbayan sa Sugbo ning bag-ohay pa lamang.

Sa wala pa naangkon ang tam-is nga kalamposan, ang PYFBA ballers nag-agi usa og duha ka overtime sa wala pa pioga ang lig-on sab kaayong Taters team pinaagi sa sikit nga desisyon,  88-86.

"Congratulations to the team for their focus and determination all throughout the tournament and a huge applause to the parents for their all-out support," matud pa ni PYFBA founder Deej Villanueva.

Si Anton Lorenzo Gratones misidlak nga labing hayag alang sa PYFBA isip Most Valuable Player (MVP) sa ilang kategoriya. Nalakip sab siya sa Mythical Five kauban si Xerex Russell Saberon nga mibira sa Clutch Player Award.

Ang ilang mga kauban mikuha sab og atensiyon. Si Ernelexis Aldave misakmit sa Hustle Award, samtang si Christian Niño Migallos gibayaw nga Assists Leader.

"We recognize raw and outstanding talents and skills and the effort of each participating team, coach and players in the hope that they don’t rest on these laurels but continue to strive harder and chase their dreams. As a developmental league, there is more area to grow and inspire each other," dason pa ni tournament organizer Felix "Donbel" Belano Jr., kanhi bitoon sa PBA nga nagkupot sa rekord isip bugtong player nga nakarehistro og quadruple-double sa usa ka duwa sa kasaysayan sa Philippine basketball.

Ubos sa pagtimon ni Jan Rellosa nga gipasidunggan nga Best Coach, ang ubang mga sakop sa PYFBA U16 champion team mao sila si Clark Jan Rellosa, Julio Edwin Brigoli, Kurt Eilliam Cose, Jersey Niño Llacuna, Nash Steven Compra, Hanz Zedric Bensig, Joseph Matthew Orosio, Jhon Cyrus Pancho, John MiguelContreras, Shawn David Linda, Ezio Drei De La Calzada, Janssen Lee Barquilla, ug Tonchi Galan.