HRRACI Sportsfest 2024 kasado na x

CEBU, Philippines — Andam na ang tanan alang sa gikahinaman nga Hotel Resort and Restaurant Association of Cebu, Inc. (HRRACI) Sportsfest 2024. Nakakuha og partisipasyon gikan sa 33 ka mga establisamento, walo ka mga events ang kumbatihan sa duha ka bulan nga kompetisyon nga mahitabo kausa lamang sud sa duha ka tuig.

Mosikad kini pinaagi sa pinakasentro niining torneyo sa basketball karong Lunes, Hunyo 3, didto sa Capitol Parish Gym sa may dalan Escario, dakbayan sa Sugbo.

Ang men’s ug women’s volleyball kumbatihan karong Hunyo 24-27 didto sa Sunken Court sa St. Theresa’s College (STC). Ang bowling gikatakda sa Hulyo 1 sa SM City-Cebu ug pagasundan kini sa badminton sa Hulyo 17-18 didto sa Metro Sports Center sa Salinas Drive, Barangay Lahug.

Ang table tennis, dodgeball, tug-of-war, ug track and field ipahigayon sa katapusang adlaw sa aksiyon sa Hulyo 21 didto sa University of Southern Philippines Foundation (USPF). Usa kini ka sadya ug kulbahinam nga panapos sa kalihukan nga gilangkoban og cheerdance competition, pagpili sa Mr. and Ms. HRRACI Sportsfest, pagkorona sa rayna sa HRRACI Sportsfest 2024, ug labaw sa tanan ang kampiyonato sa basketball ug volleyball.

Ang HRRACI gipangulohan sa presidente niining si Alfred Reyes, ang vice president for operations ug general manager sa Bai Hotel Cebu, ug executive vice president Carlo Anton Suarez, ang general manager sa Cebu Grand Hotel nga mao sab ang tsirman sa HRRACI Sportsfest 2024.-