Celtics naka-una sa NBA East finals

Apan miagi usa og overtime sa wala pa pioga ang Pacers

CEBU, Philippines — Giunhan sa Boston Celtics ang Indiana Pacers sa ilang best-of-seven NBA Eastern Conference finals.

Apan ang Celtics nag-agi usa og overtime sa wala pa paludha ang Pacers, 133-128, sa pasiunang duwa sa ilang serye kagahapon didto sa TD Garden sa Boston, Massachusetts.

Si Jayson Tatum mi-iskor og 10 sa iyang 36 puntos sa dugang singko minutos sa aksiyon aron pangulohan ang Celtics.

Ang Boston  mapasalamaton sab ni Jaylen Brown, kansang krusyal nga 3-pointer sa pinal nga 6.1 segundos sa regulasyon maoy naghatud sa duwa ngadto sa overtime. Si Brown mitapos uban ang 26 puntos samtang si Jrue Holiday mikadlit og season-high 28 puntos alang sa Celtics, nga mao gihapon ang mo-host sa Game 2 karong Biyernes.

Ang mangtas nga si Tyrese Haliburton mipupo og 25 puntos ug 10 ka assists alang sa Pacers, nga naghagba bisan og gibombahan ang Celtics og 13 ka tres.

Midugang si Pascal Siakam og 24 puntos ug 12 ka rebounds samtang si Myles Turner mihipos og 23 puntos ug 10 ka rebounds alang sa pilderong kawsa.

Nagdanga-danga na unta ang Pacers padung sa kadaogan bitbit ang tres puntos nga labaw sa katapusang 30 segundos sa regulasyon apan nakamugna og duha ka sagunson nga turnovers nga maoy hinungdan sa ilang pagkasukarap.

Ang Pacers mi-abante sa katapusang higayon sa iskor nga 123-121 human sa duha ka free throws ni Haliburton sa nahibilin nga 1:46 gumikan kay si Tatum mikumpleto sa iyang three-point play aron palabwon ang Celtics sa hingpit.