Dekalibreng mga atleta magbangga

CEBU, Philippines — Si Filipe Azevedo maoy nangu sa listahan sa dekalibreng mga atleta gikan sa gawas sa nasud nga moasdang dinhi sa Sugbo aron mokumbati sa gikahinaman nga Ironman 70.3 Lapu-Lapu karong Abril 21.

Duha ka sagunson nga korona ang tirada sa Portugese triathlete nga maoy nanghawod sa miaging edisyon sa makutas nga lumba nga naglangkob og 1.9 ka kilometro nga langoy, 90km bike, ug 21k run didto sa Davao.

Ang 31-anyos nga si Azevedo gipaabot nga magsagubang og malisud nga hagit gikan sa uban pang langyaw nga mga partisipante sama ni Tuan Chun Chang sa Chinese Taipei, nga na-3rd didto sa Davao.

Makaharong nila sila si Daniel Bakkegard sa Denmark, Henri Schoeman sa South Africa, Thomas Bishop sa England, Ben Stern sa Amerika, ug Michael Tong sa New Zealand nga nangambisyon sab paglangkat sa korona.

Ang ilang presensiya tataw nga makadugang og lamas ug kasadya sa hugot nga kompetisyon taliwala sa malisud nga kondisyon.