Thunder buhi pa ang paglaum alang sa West top seed

CEBU, Philippines — Si Shai Gilgeous-Alexander mikadlit og 23 puntos sa dihang gipayaka sa Oklahoma City Thunder ang Milwaukee Bucks, 125-107, aron pahayagan ang ilang tsansa nga labnihon ang No. 1 seed sa Western Conference playoffs.

Midugang si Chet Holmgren og 22 puntos ug siyam ka rebounds samtang si Aaron Wiggins mitapo og 19 puntos alang sa  ikaupat nga sagunson nga daog sa Thunder.

Sila si Khris Middleton ug Brook Lopez mihipos og 18 puntos matag usa alasng sa Bucks, nga miduwa nga wala ang duha nila ka mga bitoon nga sila si Giannis Antetokounmpo ug Damian Lillard kay nanga-angol.

Ang Thunder nagtabla karon og ang defending champion Denver Nuggets ug Minnesota Timberwolves sa liderato sa West bitbit ang managsamang 56-25 rekords.

Kinsa kanila ang molugwa nga West top seed masayran pagtak-op sa regular season karong Lunes.

Nagpanikad na unta ang Nuggets nga angkonon ang top seeding apan nadiskaril ang ilang plano human gipakuratan sila sa San Antonio Spurs, 121-120.

Samtang ang Wolves mipasikit og samot sa karera alang sa numero unong puwesto sa West sa dihang ilang gibalhiboan ang Atlanta Hawks, 109-106.

Sa habig sa Bucks, sakmiton na unta nila ang No. 2 seed sa Eastern Conference playoffs kon ugaling midaog sila batok sa Bucks. Ila gihapon kining makab-ot  kon ilang bihagon ang Orlando Magic o kon mapilde ang New York Knicks sa Chicago Bulls ugmang adlawa.

Didto sa Cleveland, si Donovan Mitchell mipabuto og 33 puntos, samtang si Jarrett Allen miharos og 29 puntos ug 13 ka rebounds sa dihang ang Cavaliers clinched milukat og ticket sa playoffs human gibugha ang Indiana Pacers, 129-120.

Sila si Darius Garland ug Caris LeVert midugang og 16 puntos matag usa alang sa Cavs nga nakasud sa playoffs sa ikaduhang sunod-sunod nga higayon sukad niadtong 2018 season.

Ang Pacers, Magic, ug Philadelphia Sixers nagkupot karon og managsamang 46-35 baraha. Kinsa kanila ang makabira og awtomatik nga luna sa East playoffs mahibaw-an ugmang adlawa.