CEBU, Philippines — Ang PARAK SBB Arnis Team sa Dapitan City ubos sa paggiya ni coach Cris Saldon Hamoy ug hugot nga suporta ni mayor Seth Frederick "Bullet" Jalosjos nanghawod sa bag-ohay pang natapos nga 87th Araw ng Davao Zubiri Cup National Invitational Arnis Kali Eskrima Tournament nga gipahigayon didto sa University of the Philippines (UP) UP Sports Complex sa Mintal, Davao City.
Sa kinatibuk-an, ang mga Dapitanon mihakot og 17 ka medalya nga gibuak-buak ngadto sa 10 ka golds, duha ka silver, ug lime ka bronze .
Si Hamoy mao mismo ang nangu sa mainit nga ratsada sa PARAK SBB human milangkat og bulawang medalya sa live stick ug silver sa padded stick masters division.
Si Giamiel Austin Daguinotas mipupo og duha ka golds sa live ug padded stick sa boys extra lightweight category, samtang si Elyza Celine Valeras mibira og gold sa live stick ug silver sa padded stick ubos sa girls bantamweight class.
Wala sab magpabitin sila si John Gasper Laput nga mikabkab og gold sa live stick ug bronze sa padded stick ubos sa boys Cadet C beginner, si Vanessa Lorein Sabejon nga miamot og gold sa live stick ug bronze sa padded stick sa girls lightweight, si Maxana Dhave Jumamoy nga naka-gold ug bronze sa girls extra lightweight, ug si John Leo Cirs Betong Pajaron nga midugang og gold ug bronze sa boys featherweight.
Ang ubang mga gold medalists mao sila si Cristyl Neilswind Hamoy sa girls welterweight ug John Kent Pon Vailoces sa senior beginner boys lightweight.
Sa iyang bahin, si John Wyne Fernandez midonar og bronze sa padded stick sa boys lightweight beginner.
"First of all, magpasalamat ko sa mga tawo nga nagpaluyo ug sa walay pagduha-duha misuporta namo labi na sa among mayor nga si Seth Frederick "Bullet" Jalosjos, city administrator mam Amalou Tumapon Monroyo, ug sa among tourism officer mam Apple Marie Agolong nga anaa kanunay nagpaluyo para hapsay nga magpadayon ang arnis sa Dapitan," matud pa ni Hamoy.
"We are so blessed na natagaan mi og chance nga nabiyaan sa mga bata ang gadget ug nag-train sila sa arnis.
Ako man kini sila gipahinumduman sa kanunay sa paborito nakong panultihon nga, "sticks over gadgets and exercise over radiation". Labaw sa tanan, importante kaayo nga naka-gain og experience ang mga bata para ma-aware sila unsay mga possibilities sa usa ka dako na tournament," panapos pa ni Hamoy.