Cebu Duathlon 2024 mga atleta sa Asian Orthopedics mikuha'g atensiyon sa unang leg
CEBU, Philippines — Ang mga pambatong atleta sa Asian Orthopedics nga gipangulohan ni Franklin Yee misidlak sa malampuson nga unang leg sa Cebu Duathlon 2024 nga gi-presenta sa TNR Events and Production niadtong weekend didto sa SM Seaside City.
Si Yee, nga sakop sa University of San Carlos (USC) track and field team ubos sa paggiya ni coach Arvin Loberanis, misumite sa labing paspas nga oras nga 1:55:50 aron paglugwa nga overall champion sa elite category sa makutas nga lumba nga naglangkob og 10km run, 40km bike, ug 5km run.
Si John Patrick Ciron mitapos sa ikaduhang dapit sa oras nga 1:56:32, samtang si Raymund Torio maoy na-3rd sa oras nga 2:00:10. Sila si Jarwyn Banatao (2:00:56) ug Cipriane John Topia (2:01:59) ang mi-okupar sa ikaupat ug ikalimang luna samtang ang laing batos sa Asian Orthopedics nga sila si Jonathan Pagaura nalandig sa ikaunom nga puwesto sa oras nga 2:06:57 sa iyang pagbalik gikan sa taud-taug nga pahuway.
"Franklin Yee is our elite athlete. We supported him, from conditioning to sports nutrition and injury prevention, because we want him to achieve his best potential," matud pa ni Dr. Pierre Mella, nga usa sa mga haligi sa Asian Orthopedics triathlon/multi-sport team kauban sila si Dr. Reneil Jay Pe a ug tinamod nga businessman-sportsman nga si Afshin Ghassemi.
Silang tulo mipakita sab og aksiyon diin si Ghassemi mao ang dunay labing nindot nga nakab-ot sa pagtapos niini sa ika-12 nga dapit taliwala sa lig-on nga 60 ka mga entrante ubos sa elite division.
Si Ghassemi, ang presidente sa Sacred Heart School-Ateneo de Cebu Alumni Association ug sa susamang higayon tsirman sa ilang alumni basketball association, mipatak og oras nga 2:37:39, labaw lamang og 17 segundos ni Mella nga mipahiluna sa ika-14 nga dapit. Wala hinoon makatiwas sa karera si Pe a tungod sa mekanikal nga kakulian sa iyang bisekleta.
Sa men's 40-44 division nga adunay mubo nga distansiya nga 5km run-20km bike-3k run, si Clement Po miangkon sa ikaduhang dapit sa oras nga 1:12:33. Si Zechary Talisaysay ika-24 sa men's 16-24 age group sa oras nga 1:20:10, samtang ang lain pa nilang mga kauban nga sila si Jay Cantuja ug Adrian Plania mapasigarbuhon sab kay nakalampos sa labing una nilang karera.
"We're here to promote health and wellness through movement and sports. It improves mental health since endorphins will give happy hormones," dason pa ni Mella. "Hopefully, we will be able to organize a sporting event to benefit patients and athletes who don't have money in the future."
- Latest
