CEBU, Philippines — Ang Team Casili mipakaging sa Pulpogan, 85-76, aron langkaton ang kampiyonato sa SK category A sa 12th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Sikit kaayo ang kumbati sa duha ka kampo gikan sa pagsugod hinungdan sa 65-65 nga panagtabla human sa tulo ka kuwarter.
Apan ang Casili milusad og nagkayong opensiba sa katapusang kuwarter diin ilang giwani ang Pulpogan, 20-11, aron pagsibat uban ang nuybe puntos nga kadaogan.
Sila si Melmar Maluya ug JB Macanas maoy nangu sa Casili bitbit ang 19 puntos matag usa samtang si Regnier Gonzaga miamot og 14 puntos. Si Prince Soquino miratsada og 20 puntos samtang si James Wennard Saliot ug Chil Camajalan nagkumboya'g 22 puntos apan nangaminghoy silang tanan sa habig sa Pulpogan. Ang torneyo ubos sa superbisyon ni Federation President Carlos Donn Flores, nga maoy overall sports chairman, inabagan sa iyang co-chair nga si konsehal Marilou Casul.
Si Paul Alelu Flores ang nagsilbeng league commissioner samtang sila si Lee Mhar Dahil, Agvin Jugan, ug Cromwell Cuenca mga deputy commissioners ug si Stephen Ababon ang hepe sa technical committee.