Warriors mikadlit sa unang daog CEC Dragons padayong nanginit, 2-0 na

CEBU, Philippines — Ang University of San Carlos (USC) Warriors mipapayaka sa Cebu Institute of Technology-University (CIT-U) Wildcats,78-67, alang sa una nilang daog sa 23rd Cebu Schools Athletic Foundation, Inc. (CESAFI) men’s basketball tournament niadtong Martes sa gabii didto sa Cebu Coliseum.

Si James Paolo Gica miposa og tulo ka 3-pointers sa iyang 20 puntos samtang sila si Clint Anthony Octaviano ug Vhann Joshua Baruc nagkumboya'g 23 puntos alang sa Warriors nga kontrolado kaayo ang dagan sa duwa sukad sila mi-arangkada ngadto sa sayong 24-7 nga labaw.

Misamot pa ang kainit sa Warriors ni coach Paul Joven hinungdan nga gipaburot ang ilang bentaha ngadto sa 24 puntos, 66-42, human sa tulo ka kuwarter. Misuway og gukod ang Wildcats apan gipakgang sa Warriors ang ilang       tinguha.

Si Clark Adrian Con-ui mitali og 22 puntos apan nakawang ang iyang paningkamot gumikan kay ang Wildcats nakatilaw sa ikaduha nilang sagunson nga pilde.

Sa juniors division, ang Cebu Eastern College (CEC) Blue Dragons padayong mibugwak og kayo aron pakagingon ang University of an Carlos (USC) Baby Warriors, 75-40, alang sa ikaduha nilang sunod-sunod nga daog.   

Si Caelan Mack misidlak na sab sa kampo sa CEC. Mitagak siya og 13 sa iyang 23 puntos sa eksplosibong 30-13 rally sa ikaduhang kuwarter nga nakahatag sa Dragons og 23 puntos nga labaw sa halftime, 51-28.

Human mikalma sa ikatulong kuwarter, ang Dragons ni coach Rodmark del Rosario nagmangtas og balik sa naghinapos nga bahin sa duwa diin sila mitali og 16 puntos samtang gilimitahan ang ang Baby Warriors ngadto lamang sa kuwatro puntos aron pagkab-ot og 35 puntos nga demolisyon. (BANAT NEWS)