CEBU, Philippines — Sa dihang naka-bronze medal lamang siya sa Tokyo Games duha ka tuig ang milabay, ang Pinoy'ng boksidor nga si Eumir Marcial nanumpa nga buhaton niya ang tanan aron kab-oton ang iyang damgo nga makadaog og bulawang medalya sa Olympics.
Mao kini ang misyon niya karon.
Og kay nakansela man ang ikalima unta niyang away isip pro sud ning bulana, si Marcial makapokus na og maayo sa iyang kampanya alang sa 2024 Paris Olympics sugod sa Hangzhou Asian Games sunod bulan.
Eumir (Marcial) will be coming home from the US as soon as possible and to join the national boxing team and work on his Australian visa,” matud pa ni Philippine Olympic Committee (POC) president Abraham Tolentino kagahapong adlawa.
Ang gipasabot ni Tolentino mao ang national team training camp nga mosikad karong Septiembre 1 didto sa Canberra diin makauban ni Marcial ang Tokyo Olympics silver medalists nga sila si Nesthy Petecio ug Carlo Paalam.
Moduyog kanila ang ubang sakop sa 11-man Philippine team nga sila si Tokyo Olympian Irish Magno, Aira Villegas, Ian Clark Bautista, Rogen Ladon, Ronald Chavez Jr., Mark Ashley Fajardo ug John Marvin.
Nagkalisud hinoon ang tahas nga sagubangon ni Marcial.
Kini tungod kay mokumbati na siya sa light heavyweight division human ang natural niyang middleweight category gipapha sa kalendaryo sa Paris Olympics.