Warriors, Knicks buhi pa

CEBU, Philippines — Ang Golden State Warriors ug ang New York Knicks naka-angkon pa og laing kinahuhi human gibaslan ang ilang mga karibal sa Game 5 sa tagsa-tagsa nila ka NBA conference semifinals kagahapong adlawa.

Didto sa Chase Center sa San Francisco, California, ang Warriors mipayaka sa Los Angeles Lakers, 121-106, aron lugwayan ang ilang season og usa ka duwa.

Naglabaw pa hinoon gihapon sa serye ang Lakers sa baraha nga 3-2.

Sama sa Warriors, buhi pa sab ang New York Knicks sa dihang si Jalen Brunson mipabuto og 38 puntos sa 112-103 nilang kadaogan batok sa Miami Heat didto sa Madison Square Garden.

Ang Warriors ug ang Knicks gikinahanglan nga modaog sa teritoryo sa ilang kontra karong Sabado aron makapuwersa og Game 7 nga maoy ilang misyon.

Sa kasaysayan sa NBA, 13 pa lamang ka teams ang nakabangon human malubong og 3-1 sa serye.

Nakab-ot kini sa Warriors batok sa Oklahoma City Thunder niadtong 2016 Western Conference final. Mao sab kini ang gibuhat Cleveland Cavaliers nga gipangulohan ni LeBron James batok sa Warriors sa NBA Finals sa maong tuig.

Si Stephen Curry mi-iskor og 27 puntos aron pangulohan ang unom ka Warriors nga mikadlit og double figures. Si Andrew Wiggins mikisaw uban ang 25 puntos samtang si Draymond Green mikolekta og 20 puntos ug 10 ka rebounds.

Ang Lakers wa pay pilde sa ilang korte ning playoffs apan nameligro sila sa Game 6 kon ugaling dili makaduwa si Anthony Davis, nga mibiya sa katapusang kuwarter human wala tuyoa nga nasikhan ang iyang ulo ni Kevon Looney sa Warriors.

Si Davis, nga mihipos og 23 puntos ug siyam ka rebounds, daw sa naratol nga miadto sa ilang bench apan sa kadugayan gi-agak kini ngadto sa ilang locker ug wala na mibalik sa duwa.

Si James maoy nangu sa Lakers uban ang 25 puntos. Wala sila makasanta sa enerhiya sa desperadong Warriors.

Didto sa New York, ang Knicks miposte og 19 puntos nga labaw sa ikatulong kuwarter ug wala na molingi pa sukad niadto aron putlon ang labaw sa Heat ngadto sa 3-2.   

Gawas ni Brunson, misalida sab sila si RJ Barrett ug Julius Randle nga nagkumboya'g 50 puntos alang sa Knicks.

Si Jimmy Butler dunay 19 puntos, pito ka rebounds ug siyam ka assists samtang sila si Bam Adebayo ug Duncan Robinson nagkumbinar og 35 puntos sa pidlerong Heat.