CEBU, Philippines — Si Steven Adams milansang sa labing unang game-winning basket sa iyang karera sa dihang ang Memphis Grizzlies nakalingkawas batok sa Cleveland Cavaliers, 115-114, sa NBA kagahapon didto sa FedEx Forum sa Memphis, Tennesee.
Luyo sa pagkamabayanihon ni Adams, gitabla sa Grizzlies ang record sa ilang prangkisa nga 11 ka sagunson nga daog.
"That was his first game-winner, he's definitely hyped," matud pa ni Memphis coach Taylor Jenkins agi'g pagdayeg ni Adams, nga mihipos og 13 puntos ug 10 ka rebounds.
Duna pa untay tsansa ang Cavs nga ilogon ang daog apan nga itsa ni Darius Garland natapalan ni Memphis small forward Dillon Brooks dayong kapupos sa oras.
Si Desmond Bane maoy nangu sa Grizzlies uban ang 25 puntos samtang si Morant midugang 24 puntos ug walo ka assists.
Sa standings, ang Grizzlies nagpabilin sa ikaduhang dapit sa Western Conference uban ang 31-13 nga baraha.
Usa ka duwa lamang ang ilang gintang sa Denver Nuggets, nga nagkupot na karon og 32-13 nga marka human gipaksit ang Minnesota Timberwolves, 112-118.
Nagmangtas na sab si Nikola Jokic uban ang 31 puntos alang sa Nuggets nga mikadlit sa ikawalo nilang sunod-sunod nga daog.