CEBU, Philippines — Ang mga koponan gikan sa Pulpogan ug Tayud mitikang sa semifinal round sa 11th Mayor Teresa "Nene" P. Alegado Fiesta Cup basketball tournament didto sa Consolacion, Cebu.
Si Russel Moneva mikadlit og 26 puntos, si Harold Javier mitali og 23 samtang si JC Escalona midugang og 11 puntos sa dihang gipaksit sa Pulpogan ang Cabangahan, 90-80, aron paglukat og semis ticket sa bracket A sa Inter-Barangay category A.
Ang Pulpogan alkansi og tres puntos human sa tulo ka kuwarter, 64-67, apan milusad og bagsik nga ataki sa endgame, 26-13, aron patikyaobon ang Cabangahan.
Sa bracket B, si Benhur Villamor mipupo og 26 puntos sa dihang gitagak sa Jugan ang Cansaga, 80-68. Si Villamor gipaluyohan nilang Japheth Naingue ug Erwin Brigoli nga nagkumboya'g 34 puntos.
Sa laing bahin, si Miko Mata miposte og 16 puntos samtang sila si Louie Mapa ug Xisco Cuyos nagkumbinar og 19 puntos sa dihang gibugha sa Tayud ang Poblacion Occidental, 88-63, aron pag-abante sa Final Four sa bracket A sa Midget category A.
Sa SK category A, sila si Godfrey Sabanal ug Joel Brigoli mikuha og atensiyon sa dihang gipalagpot sa Poblacion Occidental ang Tayud pinaagi sa sikit nga desisyon, 90-88.
Si Sabanal mipabuto og 29 puntos samtang si Brigoli mihipos og 26 puntos. Si Christian Jay Malagar dako sab og natampo sa Poblacion Occidental uban ang 13 puntos.