CEBU, Philippines — Ang Team Mayor Nene Alegado nga gipangulohan ni PBA superstar Arwind Santos nakaipsot batok sa Fighter Fifty, 99-96, sa ilang exhibition match nga gidugokan og mga fans niadtong weekend didto sa Consolacion covered court sa Consolacion, Cebu.
Mao kini ang sentro sa atraksiyon atol sa bonggang pagbukas sa 11th Alegado Fiesta Cup niadtong Gabado sa gabii. Si Santos, nga kadaghan na makampiyon sa PBA uban sa San Miguel Beer apan karon nagduwa na sa NorthPort, mipabuto og 36 puntos apil na niini ang lima ka makalisang nga dunks nga gikahimuot og maayo bagang panon sa mga nanan-aw sa makalingaw nga pasundayag
Ang 6'11" Senegalese big man nga si Mouhamed Faty sa Far Eastern University (FEU) Tamaraws mitagak og 19 puntos samtang si RR Garcia sa Phoenix Super LPG Fuel Masters milansang og 12 puntos alang sa Team Alegado. Sila si Roger Ray Pogoy sa TNT Tropang Giga ug Alec Stockton sa Convergys FiberXers parehong mi-iskor og otso puntos samtang ang kanhi PBA players nga sila si Denok Miranda ug Mark Isip, nga mao na karon ang coach sa pinangga nilang tunghaan nga FEU, nagkumbinar og nuybe puntos alang sa Team Alegado, nga kanunay naggukod sukad sayong nabiyaan og nuybes puntos, 19-28.
Alkansi gihapon og tres puntos human sa ikatulong kuwarter, 73-76, si Santos ug ang iyang mga katropa milusad og madasigon nga resbak nga naghinapos nga bahin sa duwa aron pagtuboy sa Team Alegado ngadto sa kulbahinam nga kadaogan.
Ang kanhi bitoon sa PBA nga usa na karon ka pulitiko nga si Dondon Hontiveros maoy nangu sa Fighter Fifty uban ang 25 puntos ug gisundan kini ni Nico Magat nga dunay 18 puntos.
Sila si JR Quinahan sa NLEX Road Warriors, Iron Suano, ug Danny Aying nagkumboya'g 30 puntos sa pilderong kawsa.