Makasaysayanong Madridejos Fiesta Race modikad na karon

CEBU, Philippines — Panid sa kasaysayan ang masuwat sa dihang ang labing dako nga cycling event sa lungsod sa Madridejos mo-arangakada na sayo karong buntag uban ang dul-an sa 200 ka mga seklista lukop sa paraisong isla sa Bantayan nga nagpanikad nang mopakita’g aksiyon. 

Sugdan ang kumbati sa alas 5:30 sa buntag ning makutas nga “LGU Madridejos Fiesta Race” nga naglangkob og kinatibuk-ang distansiya nga 25.8 kilometros ubos sa open division sa mountain bike ug road bike competition.

Lain pang mga kategoriya nga banatan ning usa ka adlaw nga lumba nga giorganisa sa Madridejos Cycling Club (MACYC) mao ang women's, men's 17 Under, 36-49, ug 50-above age group sa ug 15-below sa road bike.

Tanan, 175 ka mga sektlista ang magpinaksitay alang sa nag-unang dungog sa tagsa-tagsa nila ka mga klasipikasyon.

Miabot ngadto sa P56,000 nga ganting salapi kortesiya sa LGU Madridejos luyo sa liderato ni Mayor Salvador "Sally" De La Fuente ang ipanghatag sa mga mananaog ning kalingawan sa paugnat sa kusog nga gituyo aron pagdugang sa kasadaya sa tinuig nga pista sa mga Lawisanon agig pagtamod sa minahal nilang patrona nga Inmaculada Concepcion karong Disiembre 8. Gawas sa mga tropeyo, medalya ug sertipikasyon, ang top 3 sa men’s open division sa mountain bike ug road bike parehong mobulsa og P5,000, P3,000, ug P2,000.

Samtang ang top 3 sa women's open, men's 17 Under, 36-49 ug 50-above age group sa mountain bike ug 15-below category sa road race makakubra og P3,000, P2,000 ug P1,000 nga pahalipay.

Gawas niini, ang mga kampiyon sa tanang walo ka mga kategoriya makadawat sab og tagsa ka sako nga bugas, samtang kadtong makalandig sa ikaduha ug ikatulong puwesto dunay tag-15 ka kilo nga bugas. 

Duna say ipa-raffle nga usa ka brand new mountain bike alang sa tanang mga partisipante, samtang pipila ka mga SB members ang manghatag og mga bike items ug accessories aron pagdugang og kasadya sa okasyon.