CEBU, Philippines — Mikayod og maayo ang mga beterano sa San Miguel Beermen nga mipusoy sa Alaska Aces, 92-88 sa nagkainit nga aksiyon sa PBA Philippine Cup didto sa Smart 5G-powered AUF Sports Arena sa Angeles City, Pampanga.
Si Alex Cabagnot mipabuto og 19 puntos alang sa Beermen, samtang si Arwind Santos miposa og lima ka tres sa iyang 17 puntos uban ang 10 ka rebounds nga igo na kaayo alang kaniya aron bayawon isip "Player of the Game".
Ang sentrong si Mo Tautaa mirehistro og 16 puntos, unom ka rebounds ug unom sab ka assists, si Marcio Lassiter mitampo'g 13 puntos, samtang si Chris Ross mitali og 10 puntos alang sa Beermen nga miposte sa ikaduha nilang sagunson nga daog ug ikatulo sa kinatibuk-an sud sa lima ka duwa.
Ang rookie nga si Kevin Barkley Ebona ug Vic Manuel parehong mirehistro og 18 puntos alang sa natutyo nga Aces, kansang tulo ka sunod-sunod nga daog napakgang ug natagak ngadto sa 3-3.
Sa laing bahin, si Christian Standhardinger mikolekta og 23 puntos, 12 ka rebounds ug lima ka assists, samtang si Kelly Nabong miamot og 18 puntos uban ang walo ka rebounds sa dihang gipaksit sa Northport Batang Pier ang TerraFirma Dyip, 107-96 alang sa una nilang daog sud sa lima ka duwa.
Si CJ Perez mikamida og 25 puntos, apan wa'y nahimo gumikan kay ang Dyip nagpabilin bokya human sa upat ka duwa.