CEBU, Philippines — Laraw sa Pinoy'ng boksidor Felix Eumir Marcial moaway isip pro sa labing unang higayon karong Oktubre.
Matud pa ni MP Promotions president Sean Gibbons nga mao kini ang gilantaw nilang direksiyon alang ni Marcial samtang kini nangandam sab sa iyang kampanya alang sa Tokyo Olympics sa Hulyo sunod tuig. Midugang si Gibbons nga ang away adto ipahigayon sa Los Angeles.
Buot nilang paawayon si Marcial tulo ka higayon sa dili pa kini moasdang sa Tokyo diin si Marcial naglaraw nga tunolan ang Pilipinas sa dugay na kaayo niining gihandum nga labing unang gold medal sa Olympics.
Sa una niyang away isip pro, si Gibbons mibutyag nga upat ka hugna usa lamang kini. Puwede na silang modagan sa unom ka hugna depende sa resulta.
Giklaro ni Gibbons nga dili nila dali-dalion ang karera sa pro ni Marcial ug dili dayon kini nila ilawog sa mga bug-at ug dekalibreng pangan karon sa boksing. Basi sa iyang pangagpas, si Gibbons namahayag nga lagmit makaaway si Marcial alang sa world title tulo pa ka tuig gikan karon.
“By the third year (as a pro) I think he’ll be able to challenge someone for the title,” matud pa ni Gibbons sigun sa taho sa The Philippine STAR.