Piloto ni Bryant misuway likay sa hamog

CEBU, Philippines — Ang piloto sa na-crash nga helicopter nga mikalas sa kinabuhi ni Kobe Bryant ug lain pang walo ka mga tawo misuway og likay sa baga kaayong hamog (fog) sa wala pa kini mahagsa didto sa bukirang bahin sa Calabasas, California.

Basi sa mga dokumento gikan sa makuting imbestigasyon nga gipagawas sa National Transportation Safety Board (NTSB), ang piloto nga si Ara Zobayan ni-radyo sa air traffic controllers aron pagpahibawo nga mikatkat siya ngadto sa 4,000 ka tiil sa wala pa mahitabo ang trahedya.

Ang makapakugang nga insidente niadtong Enero 27 (oras dinhi sa Pilipinas) mikutlo sa kinabuhi sa ni Bryant ug sa 13-anyos niining anak nga si Gianna ingon man ang piloto  ug lain pang unom ka tawo.

Ang NSTB gikaktada nga mopahibalo kon unsa gyud ang nahitabo inubanan sa ilang rekomendasyon aron dili na mausab pa ang maong makalisang nga hitabo sa umaabot.

Si Bryant, 41-anyos, nakadaog og lima ka kampiyonato sud sa 20 ka tuig niyang pagduwa sa Los Angeles Lakers. Siya maoy MVP niadtong 2007-2008 season, nahimong All-Star 18 ka higayon, kaduha na Finals MVP ug kaupat na All-Star MVP.