Vargas: Kaabtik mas hait nga armas ni pacquiao kay sa kusog
CEBU, Philippines — Kulatado kaayo si kanhi two-division world champion Jessie Vargas sa dihang gipilde pinaagi sa unanimous decision ni Manny Pacquiao atol sa ilang WBO welterweight title bout niadtong Nobiyembre 2, 2016 didto sa Thomas and Mack Center sa Las Vegas.
Nakig-estorya ni host Chris Lloyd sa Lockdown Tapes series sa Matchroom dili pa lamang dugay, gilab-as ni Vargas ang maong away nga iyang gihulagway nga usa ka maanindot nga kasinatian. Si Vargas nga mikita og $2.5 million sa maong sangka, nagkanayon nga si Pacquiao daghang kumo nga nasipyat, apan siya mismo nagkalisud sab paglandig sa iyang mga birada gumikan sa kaabtik sa Pinoy ring star.
"I had difficulties, too, because he’s so fast. I was trying to play target practice with him, but he’s moving left and right; he’s quick!," matud pa ni Vargas segun sa taho ni Scott Christ sa badlefthook.com. Ang 31-anyos nga si Vargas nasayod nga si Pacquiao usa ka power puncher.
Apan bisan pa man og natumba siya sa ikaduhang hugna ug nakahiagum og gisi sa tuo niyang kilay sa ikawalong hugna gumikan sa hait nga mga suntok ni Pacquiao, si Vargas nagkanayon nga wala niya mabati ang gamhanang puwersa sa kusog sa Pinoy'ng kampiyon. Alang ni Vargas, ang kaabtik ug kapaspas ni Pacquiao mas labing hait niining hinagiban kay sa iyang kusog. “I think it’s his positioning that gives him some of the power, but mainly it’s his speed,” dugang pa ni Vargas. “I’m sure he’s a power puncher, but I didn’t feel his punching power, honestly. Now his speed was dangerous. If you don’t see his punch, he can take you down.”
Daghan na siyang naagian nga mga malisud nga gubat, apan si Vargas miangkon nga si Pacquiao wa'y lalis maoy labing lisud nga kontra nga iyang nakasangka sa iyang karera.
- Latest
