Taliwala sa lockdown Cebu City bets misidlak sa online dance contest

CEBU, Philippines — Mga sakop sa Dancesport-Team Cebu City mikulit og kasaysayan human nakadaog og usa ka silver ug usa ka bronze medal sa labing unang World Dance Online Competition  didto sa Italy niadtong weekend.

Sama sa usa ka regular nga kompetisyon, ang mga partisipante nag-agi og eliminasyon dayon na ngadto sa semis ug finals diin ang mga judges mihatag kanila og rating pinaagi sa Zoom.

Ang manag-asawa nga silang Shardie Abellana ug Marjorie Pasaje maoy nangu sa DTCC uban ang silver sa 35-under Latin-rumba dance.

Sila si Abellana ug Pasaje anaa magpuyo sa  Alaska, Barangay Mambaling ning Dakbayan sa Sugbo nga gipaubos karon sa lockdown gumikan sa kadaghan niini og kaso sa Covid-19.

Bisan pa man sa limitado nga espasyo ug sa wala nila pasayaw sa usa ka standard nga dancefloor, sila si Abellana ug Pasaje mihimo gihapon og impresyon sa mata sa mga hurado nga mipadaog kanila og silver medal.

Gamay ra kaayo ang ilang gintang sa Spain nga maoy mibira sa gold ubos sa pagpangu ni Jose Maria Gonzales.

Ang Spain mitala og 26.60 puntos, nipis ra kaayo og labaw nilang Abellana ug Pasaje nga nakakuha og 26.50 puntos.    

Sa laing bahin, si Trixie Dicdican sa Barangay Ermita naka-bronze sa under-13 lady-solo five event.

Lain pang duha nila ka mga kauban nga sila si Ouie Selene Rendon ug Sofia Isabella Maree Quilaton nalandig sa ikalimang dapit sa tagsa-tagsa nila ka dibisyon.

Si Rendon nakaabot sa finals sa ladies under-16 solo samba, samtang si Quilaton sa under-13 age group sa chachacha ug rumba.