CEBU, Philippines — Sukad siya gitudlo nga head coach sa Don Bosco basketball program niadtong Pebrero, daghan unta kaayo og plano si Albert Alocillo sa tinguha nga makaporma og lig-ong Greywolves team alang sa 20th Cebu Schools Athletic Foundation, Inc. (CESAFI) season ning tuiga.
Apan temporaryong nahunong ang iyang training program gumikan sa enhanced community quarantine nga gimando sa kagamhanan aron batukan ang coronavirus pandemic.
Bisan pa ning sitwasyon, si Alocillo kanunay migahin og oras aron makig-estorya sa iyang mga players aron sila giyahan ug hatagan og tambag kon unsay labing maayo nilang pagabuhaton ning panahon sa kwarantin.
Salamat sa social media, napadangat ni Alocillo kon unsay gusto niyang ipabuhat sa iyang mga players pinaagi sa ilang group chat, apil na niini ang pagpabilin sa maayong kondisyon ug pagsunod sa house workout nga iyang giplastada alang kanila.
Iya sab giawhag ang iyang mga sakop nga manghinuklog sa nagkadaiyang aspeto sa ilang kinabuhi, apil na ang pagplano kon unsaon nila paglambo isip usa ka tawo ug usa ka estudyante.
Si Alocillo miangkon nga siya mismo dunay naamgohan taliwala nilang krisis panglawas nga nanghasi sa tibuok kalibotan.
"Thinking deeply out of this pandemic, I realized that there are so many real heroes that we neglect in times of abundance.
Nurses, doctors, our military, police officers, farmers, garbage collectors, and health workers, among others," matud pa ni Alocillo. "To all the frontliners, we honor your sacrifices and hardwork, you are the real heroes."
Mangiob man tuod sa pagka karon ang dalan nga giagian sa mga katawhan, apan masaligon si Alocillo nga dunay maanindot nga ugma nga nagpaabot sa tanan uban sa paggiya sa Ginoo nga labing gamhanan.
"I am very optimistic that after this pandemic, players, parents and coaches will be transformed to be better individuals," dugang pa ni Alocillo. "God is amazing. He is great, he is in control, he causes all things for our good and for His glory."