Rozier bida sa Hornets vs Rockets;Warriors mitumba sa 76ers

CEBU, Philippines — Si Terry Rozier mikadlit og 24 puntos alang sa Charlotte Hornets nga mipahimus sa eksplosibo niining sinugdanan aron i-ugbok ang Houston Rockets, 108-99, sa NBA kagahapon didto sa Spectrum Center sa Charlotte, North Carolina.

Ang Hornets maoy mi-iskor sa nag-unang 20 puntos sa duwa ug sukad niadto wala na nila hatagi pa og tsansa ang Rockets nga makabangon.

Dako sab og natampo sila si Devonte Graham ug P.J. Washington nga nagkumbinar og 45 puntos ug ingon man sila si Cody Zeller ug Miles Bridges nga nagkumboya og 23 puntos alang sa balanseng ataki sa Hornets.

Ang Rockets, nga miduwa nga wala si Russell Westbrook, nakakuha og gamayng opensa gawas nilang  James Harden ug Robert Covington.

Si Harden mirehistro og triple-double uban ang 30 puntos, 10 ka rebounds ug 14 ka assists apan nakamugna og katunga og katunga sa 20 ka turnovers sa Rockets.

Si Covington mihipos og 25 puntos alang sa Houston nga nasagunsonan og tulo ka pilde sa ikatulong higayon ning season.

Sa laing aksiyon, si Damion Lee mipabuto og 24 puntos samtang si Eric Paschall mipupo og 23 puntos apil na ang duha ka free throws sa pinal nga minuto sa duwa nga maoy nag-aswat sa Golden State Warriors ngadto sa 118-114 nga daog batok sa Philadelphia.

Didto sa Cleveland, si Kevin Love mi-iskor og 27 ug si Collin Sexton midugang og 25 puntos sa dihang gipiog sa Cavaliers ang Denver Nuggets, 104-102.