CEBU, Philippines — Wala pa siya tugti nga makabalik sa PBA, apan ang kontrobersyal nga All-Star nga si Calvin Abueva mipresentar nga moduwa uban sa Gilas Pilipinas alang sa nagsingabot nga Southeast Asian Games sunod buwan didto sa New Clark City sa Tarlac.
Ang 6-foot-5 nga si Abueva padayong nagpaabot kung kanus-a libkason ni PBA Commissioner Willie ug kung mutugut ang PBA ug iyang koponan nga Phoenix Fuel Masters, gusto unta niya nga mo-ensayo ug moduwa uban sa Gilas Pilipinas aron usab matambalan iyang kauhaw nga makaduwa.
Gawas pa nga dul-an sa lima ka buwan na siya nga wala kapakita og aksiyon sulod sa hardcourt, miingon si Abueva nga dugay na niya nga damgo nga makaduwa sa SEA Games nga wala pa gyud niya mabuhat.
“Never pa ako nakalaro sa SEA Games kaya hopefully makalaro ako soon kung mabibigyan pa ako ulit ng pagkakataon,” matud pa ni Abueva sa The Philippine STAR.
Ginganlan na ni Gilas coach Tim Cone ang 15-man lineup alang sa SEA Games, apan pabiling bukas si Abueva sa posibilidad nga imbitaron siya.
Sa pagkakaron, si Abueva nagpasingot uban sa Phoenix sa mga team practice human usab siya gitugti sa PBA nga makaapil.