Casili mipaduol sa seniors A title; David Justin abante sa finals

CEBU, Philippines — Si Rey Gonzaga mitagak og 24 puntos sa dihang gilabhan sa Casili ang Poblacion Oriental, 80-69 sa Game-1 sa ilang best-of-three finals series ug usa na lang ka daog ang ilang kinahanglan  aron sakmiton ang seniors category A title sa 10th Mayor Alegado Cup Inter-Barangay Fiesta Basketball League didto sa Consolacion Sports Complex.

Mitali si Jonas Cayanong og 16 puntos, samtang sila si Junjun Patigayon ug Dwight Gonzaga parehong mi-iskor og 10 sa Casili nga nagmangtas sa final half aron piugon ang Poblacion Oriental.

Labaw lamang og dos puntos sa halftime, 41-39, ang Casili miwani sa Poblacion Oriental sa nahibiling duha ka kuwarter, 39-30 aron pagsilyo sa ilang daog.

Si Lymuel Malagar mitapos uban ang 22 puntos, samtang si Jon Haniel Abinales midugang og 20 puntos sa pilderong kawsa sa Poblacion Oriental.

Sa open category, ang wa'y pildeng David Justin ni team owner Dennis Maglasang hingpit nang miangkon og luna sa finals human gipalagpot ang Saritha, 80-70.

Sila si Erwin Brigole ug Joseph Cabahug nagkumbinar og 37 puntos, samtang sila si Russel Moneva ug Chris Yonnel Perolino miposte og 13 puntos matag usa alang sa David Justin nga wala na molingi pa  human miposte og  29-11 nga labaw sa first period.

Ang mga duwa ubos sa superbisyon ni commissioner Paul Alelu Flores inabagan ni technical committee chief Aurelio Eslawan.