Castro mobalik sa Gilas
CEBU, Philippines – Seryoso ang Samahang Basketball ng Pilipinas (SBP) sa ilang kampanya pagpanalipod sa ilang trono sa Southeast Asian Games karong Nobiyembre 30 hangtod sa Disyembre 11 diin ang Pilipinas usa sa mga host.
Tungod niini, ang Gilas Pilipinas ubos sa bag-ong coach niining si Tim Cone mipagawas sa lista sa ilang 15-man pool nga gilangkuban sa mga PBA veteran stars.
Wala madayon ang plano sa SBP nga mopaduwa'g mga amateur ug collegiate players nga una nilang giplano.
Mismo si Cone ang gihatagan og katungod sa SBP nga mopili og mga players diin unom niini iyang mga players sa Barangay Ginebra nga sila si LA Tenorio, Scottie Thompson, Stanley Pringle, Japeth Aguilar, Greg Slaughter ug Art dela Cruz.
Si Cone mipasabot nga unom iyang gibira gikan sa Ginebra tungod kay mao kini ang nasuhito sa iyang sistema ug wala na'y panahon aron mapalig-on ang team chemistry sa nasudnong koponan.
Laing dakong surprisa ang pag-apil og balik sa retiradong sa TNT KaTropa star Jayson Castro.
Uban niya ang iyang teammates nga sila si RR Pogoy ug Troy Rosario, samtang mga magduduwa sa San Miguel Beermen naglakip nila ni Chris Ross, Marcio Lassiter, Christian Standhardinger ug JuneMar Fajardo. Mokumpleto sa line-up sila si Vic Manuel sa Alaska Aces ug Matthew Wright sa Phoenix Fuel Masters.
Giklaro ni Cone nga wala sa ilang plano ang pagkuha pagbalik sa serbisyo ni naturalized center Andray Blatche.
- Latest
