Saludar nanulong na sa Puerto Rico
CEBU, Philippines – Ang Pinoy'ng kampiyon nga si Vic Saludar mitaak na sa Puerto Rico aron modepensa sa korona sa teritoryo sa iyang kontra.
Si Saludar gikatakda nga manalipod sa iyang WBO minimumweight title batok sa Puerto Rican niining mandatory challenger nga si Wilfredo 'Bimbito' Méndez sa main event sa "Casino Metro Boxing Nights" karong Agosto 24 didto sa Puerto Rico Convention Center.
Segun sa taho ni Carlos Costa sa Philboxing, si Saludar mipadayag nga andam na kaayo siya nga panalipdan ang iyang trono.
"We come to Puerto Rico to make a good fight. We are well-prepared after a long training camp to keep my title," matud pa ni Saludar.
Mao kini ang ikaduhang pagpanalipod ni Saludar sa bakus nga iyang nabira human gipukan ang Hapon nga si Ryuya Yamanaka (16-3, 5KOs) niadtong Hulyo sa miaging tuig didto sa Kobe.
Sa una niyang depensa, ang garbo sa Polomolok, South Cotabato mibuntog si Masataka Taniguchi (11-3,7KOs) niadtong Pebrero ning tuiga.
Ang 28-anyos nga si Saludar dunay 19-3 record uban ang 10KOs, samtang si Méndez kausa pa lamang mapilde sa 14 ka away, apan lima lamang sa iyang mga biktima ang iyang gipalukapa.
- Latest
