CEBU, Philippines – Ang Sugboanong lightweight contender nga si Mercito 'No Mercy' Gesta mokatkat og balik sa ring aron makigbinukbukay sa Mehikanong si Juan Antonio 'El Mozo' Rodriguez karong adlawa didto sa Avalon Hollywood.
Makasaysayanon ang ilang sangka kay mao kini ang main event sa labing unang edisyon sa Golden Boy DAZN Fight Night series.
Si Gesta, lumad gikan sa Dakbayan sa Mandaue, apan atua na karon magpuyo sa San Diego, California, dunay 32-2-2 record uban ang 17KOs, samtang si Rodriguez nagbitbit og 29-7 nga baraha uban ang 25KOs.
Kun basahon ang ilang rekord, si Rodriquez klarong nakabentaha, apan ang 31-anyos nga si Gesta masaligon nga makadalit
siya og eksplosibong kumbati batok sa Mehikano niyang karibal ilabi na kay mismo si Hall of Fame Trainer Freddie Roach maoy mibaid sa iyang abilidad.
Gawas niini, mahinungdanon ang maong sangka alang ni Gesta kay makahatag kini kaniya og laing oportunidad nga maka-away og balik alang sa world title kun ugaling molampos siya.
Si Gesta duha ka higayon nga misuway og angkon og world title, apan gibuntog siya nilang IBF lightweight champion Miguel 'Titere' Vazquez ug WBA, WBC Diamond ug Ring Magazine champion Jorge 'El Niño de Oro' Linares.
Midaog hinuon si Gesta pinaagi sa desisyon sa miaging niyang away batok ni Roberto 'Tito' Manzanarez niadtong Hunyo 2018.