CEBU, Philippines – Gikompirma kagahapon ni Deontay Wilder nga modepensa siya sa iyang WBC heavyweight title batok ni Dominic Breazeale human madiskaril ang giplano unta nilang 'rematch' ni Tyson Fury.
Ang wala pa'y pildeng si Wilder makigharong ni Breazeale karong Mayo 18 didto sa Barclays Center sa New York.
"I'm very happy that I get a chance to get a mandatory out of the way, because I consider mandatories like flies buzzing around my head," matud pa ni Wilder sa usa ka press conference didto sa New York.
Si Wilder nga nagkupot og 40-0-1 record uban ang 39KOs, manalipod sa iyang trono sa ikasiyam nga higayon, samtang si Breazeale, nga nagbitbit og 20-1 nga baraha uban ang 18KOs, mosuway og angkon og korona sa labing unang higayon.
Bisan og dehado kaayo sa tapad, si Breazeale wala mahadlok ug mibahad pa gani kini nga molusad og usa ka eksplosibong hagit batok sa 33-anyos nga kampiyon.