CEBU, Philippines – Sila si Vince de la Torre ug Amado Olea Jr. maoy nanghawod sa hiniusang Enero ug Pebrero nga edisyon sa Cebu Executives and Professionals Chess Association (CEPCA) monthly tournament niadtong weekend didto sa Barracks Chess Club sa Robinsons Galleria Cebu.
Giangkon ni De la Torre ang unang dapit human mitali og 4.5 points, samtang si Olea maoy mipahiluna sa ikaduhang puwesto bitbit ang 4.0 points.
Gipakyaw og daog ni De la Torre ang nag-una niyang upat ka duwa batok nilang Olea, Jose Atillo, Manny Manzanares ug four-time grand champion Rogelio Enriquez Jr. sa wala pa sila magtabla ni Leo Cortes sa final round.
Gawas nga mibulsa og ganting salapi, sila si De la Torre ug Olea nakaangkon sab og luna sa grand finals nga gibansagan og "Battle of Champions" karong Disyembre.
Sila si Enriquez, Dominador Salazar Jr. ug Leo Cortes maoy nalandig sa ikatulo hangtod sa ikalimang puwesto uban ang 3.5 points.
Naglangkob sa top 10 mao sila si Adelyn Bensi, Norman Olayvar, Jose Atillo, Ruel Hortelano, ug Manny Mazanares.