Sentro sa Cavs nayayay, di kaduwa usa ka bulan
CEBU, Philippines – Naputol ang nindot untang salida ni Tristan Thompson karon nga season.
Ang bitoon nga sentro sa Cleveland Cavaliers dili makaduwa sud sa usa ka buwan human na-injured ang walang tiil niini atol sa 92-108 nilang kapildihan ngadto sa Milwaukee Bucks niadtong Martes.
Lain na sab kining kalbaryo nga sagubangon sa nagkagidlay nga Cavs nga unom pa'y daog sa 27 ka duwa.
Nayayay si Thompson sa ikatulong kuwarter sa dihang naliso niya ang iyang tiil human matamaki ang tiil ni Bucks guard Malcolm Brogdon. Misuway pa unta siya nga magpabilin sa duwa, apan sa kadugayan misenyas nga magpakuha.
"I just fell forward on it, it'll be all right," matud pa ni Thompson. "It happens when you're rebounding and the little guys are down there. It's part of the game. I'm just glad I was able to walk off on my own two feet."
Nagkanayon si Thompson nga dili seryoso ang iyang injury, apan mopaubos pa siya og dugang eksaminasyon aron pagsuta sa tinuoray niyang kondisyon.
Si Thompson nga walo ka tuig nga beterano sa NBA, dunay average nga 12 points ug career-high 11.6 rebounds matag duwa karon nga season.
- Latest
