CEBU, Philippines — Subling gipakita sa undefeated nga si Terrence Crawford nga siya ang labing kusug nga pwersa sa welterweight division human niya gipaundang sa 12th round ang Mexican challenger nga si Jose Benavidez didto sa Nebraska.
Kulbahinam ang sinukliay sa duha ka kusug nga welterweights, apan mas mipatigbabaw gyud ang kusug ni Crawford nga milampos pagdepensa sa iyang WBO welterweight belt.
Ang 31-anyos nga si Crawford misaka karon sa record nga 34-0, 25KOs diin giatangan ang usa ka dakung unification fight niya batok sa ubang kampiyon sa 147 pounds sama nila ni IBF champ Errol Spence o ni WBA champion Manny Pacquiao.
Si Benavidez mipakita nga wala siya mahadlok ni Crawford diin wa niya atrasi ang American champion, apan usa ka bangis nga uppercut sa iyang suwang ang gipatugpa ni Crawford sa katapusang round nga daling mipahayang kaniya.
Misuway pa og bangon si Benavidez, apan grabe ang epekto sa kakusug sa maong sukmag ug misarasay siya sa ring rasun nga giundang sa referee ang away. (BANAT NEWS)