RJ Store nakabawi dayon; 4Nichols farm daog sab
CEBU, Philippines – Nakabawi dayon ang RJ Store human masugamak dihang ilang gilugoan ang Victorious Eagle, 65-60 sa sikit ug kulbahinam kaayo nilang duwa sa 13th J&J Surplus Ballclub niadtong Martes didto sa GT Academy gym sa Tayud, Lilo-an.
Pagsugod pa lang, higpit na kaayo ang duwa, diin nagligas lang og uno punto paghuman sa unang kuwarter, 21-20 pabor sa Victorious Eagle. Tungod sa kanipis sa labaw, nakuha sa RJ Store ang momentum ug mao na ang milabaw sa halftime, 32-27.
Gamay ra man tuod ang labaw sa RJ Store, apan ila kining naprotehian hangtod nahurot ang oras sa duwa.
Diyes puntos ra ang naiskor ni Joel Sayta, apan igo na kaayo kini aron mangulo sa scoring sa RJ Store ni Jun Rayan Pepito nga aduna na'y 4-1 nga baraha.
Si Ralph Lascuña mitusik og 17 puntos ug mao sab ang nangu sa nabihag nga Victorious Eagle ni Danrex Bayonla.
Sa pasiunang duwa, ang 4Nichols Farm mipupo na sab og daog dihang ilang gilat-an og maayo ang Union Galvasteel, 110-64.
Sila si William Alegado ug Edwin Apas maoy nangu sa lima ka 4Nichols players nga mitanom og double figures nga parehong miharbis og 19 puntos.
Labaw og 22 puntos ang 4Nichols sa halftime, 45-22 ug mitubo pa kini ngadto sa 69-41 human sa tulo ka kuwarter. Samtang nagkagamay ang oras, nagkadako sab ang labaw sa 4Nichols Farm.
Sila si Jaybee Gellocane ug Junjun Lozano mipugnit og 14 puntos matag usa aron mangu sa Union Galvasteel ni Arnold Labustro.
Ang liga nahimo pinaagi sa paningkamot nilang ballclub president Henry Agbon ug commissioner Fury Trazona, ingon man sa tanang team managers.
PUNTOS MATAG USA
Unang duwa:
4NICHOLS (110) – Alegado 19, Apas 19,, Japos 14, Berandal 12, Cabahug 10, R. Ponce 8, Cañete 6, Lascuña 6, J. Ponce 6, Cortes 2, Pepito 2, Monte 1.
UNION Galvasteel (64) – Gellocane 14, Lozano 14, Tiongzon 13, Gaiti 8, Judaya 5, Mantos 2, Yballe 2, Flores 2, Obial 2, Mantos 2.
Ikaduhang duwa:
RJ Store (65) – Sayta 10, Rojo 9, Mendoza 9, Noynay 8, Pepito 8, Nogas 6, Caparroso 5, Montejo 5, Cortes 5, Arocha 2.
VICTORIOUS (60) – R. Lascuña 17, Induno 10, Bayonla 9, Cobong 9, Molo 4, Patalot 3, Lascuña 2, JL James 2, Calipes 2, Wagas 2.
- Latest
