CEBU, Philippines – Determinado si ALA Gym rising star Kevin Jake Cataraja (7-0, 6KOs) nga mohimo og impresibong daog batok ni Indonesian Frengy Rohi (5-4, 1KO) sa main event sa IDOL 3 boxing series karong Sabado didto sa Tabuelan Astrodome.
Gawas nga moaway atubangan sa iyang mga kaliwat, si Cataraja miingon nga wa'y makapugong kaniya sa pagkuha sa daog kay mao kini ang moabli sa mas dagko nga oportunidad.
Gusto sab kuhaon ni Cataraja ang kahigayonan nga moaway alang sa usa ka regional title nga maoy gisaad kaniya sa ALA Promotions kun makapakita kini og nindot nga away.
Posible usab nga ilakip si Cataraja sa undercard sa sangka ni Pinoy boxing icon Donnie Nietes ug Ashton Palicte sa Agosto didto sa Estados Unidos kun impresibo iyang ipakita batok kang Rohi.
"Maningkamot gyud ko aning duwaa. Bisan og dili knockout basta mapakita lang nako akong skills ug hinog na ko," matud pa ni Cataraja atol sa press conference kagahapon didto sa St. Mark's Hotel.
"We are planning gyud nga hatagan siya og regional title fight this year pero nagdepende tanan sa iyang performance," matud pa sa trainer ni Cataraja nga si Edito Villamor.
Sa supporting main bout, ang stablemate ni Cataraja nga si Virgel Vitor moharong ni Gerpaul Valero.
Sa undercards, si Christian Bacolod makigbinukbukay ni Mervin Lulu, si Jimmy Paypa makigsangka ni Jun Ryan Quimbo, magsinukliay og kumo sila si Esneth Domingo ug Ryan Makiputin, si Justin Darap mobatok ni Elmer Liboon ug si JR Villafuerte makig-binukbukay ni Tomas Rebusit.