CEBU, Philippines — Miabot na gyud ang bulawanong oportunidad sa mga palad sa wa pay pildeng Sugboanong featherweight contender nga si Jhack ‘El Capitan’ Tepora.
Apan ang pambato sa Omega Gym gikatakda nga makigbinukbukay sa Mehikanong si Edivaldo ‘Indio’ Ortega alang sa bakanteng International Boxing Organization (IBO) featherweight belt sa undercard sa WBA welterweight championship bout tali nilang Manny Pacquiao ug sa kampiyong si Lucas Matthysse karong Hulyo 15 didto sa Kuala Lumpur, Malaysia.
Si Tepora nga mibuak sa maayong balita sa iyang Facebook page kagahapon, nagkanayon nga mopaubos dayon siya og subsob nga pagbansay-bansay pangandam sa gihulagway niyang labing dako nga away sa iyang kinabuhi.
“Dako kaayo ko og pasalamat sa OPSI (Omega Pro Sports International) ug sa akong manager nga si sir Paolo Castillo nga gihatagan ko nila ani kadako nga break,” matud pa ni Tepora. “Ug akong ipasalig modaog gyud ko aning duwaa pero dili ko mosaad og tumba.”
Ang 25-anyos nga walhong birador wala pa’y pilde sa 21 ka away uban ang 16KOs. Mihimo siya og impresiyon sa miagi niyang salida human miiskor og one-punch knockout batok ni Lusanda Komanisi aron paglangkat sa WBO Inter-Continental featherweight title niadtong Septiyembre 22 sa miaging tuig didto sa Orient Theatre sa East London, South African.
Nakampiyon sab siya kaniadto sa WBO Oriental ug sa WBO Asia-Pacific Youth super bantamweight.
Angayan hinuon nga magmatngon si Tepora gumikan kay ang 27-anyos nga Mehikano niyang karibal dekalibre usab.
Si Ortega naglukdo og 26-1-1 record uban ang 12KOs. Apil sa makapakurat niyang daog batok sa kababayan ni Tepora ug three-time regional champion Drian Francisco pinaagi sa unanimous decision niadto lang Enero 27 didto sa Auditorio Municipal sa Tijuana, Mexico.