CEBU, Philippines - Upat ka kampiyonato apil na ang IBF Youth super flyweight title fight maoy pasiunang dalit sa Sanman Promotions karong tuiga ug gikatakda kini sa Pebrero 25 didto sa Trade Hall Convention Center sa SM-General Santos City.
“We are starting with a big show and this is just the start. Sanman Promotions is shifting to high gear this year,” matud pa ni Sanman chief executive officer Jim Claude Manangquil.
Matud ni Manangquil, nga karong 2017 mopasiugda sila og 10 ka promosyon apil na dinhi sa Sugbo ug didto sa kaulohan.
Sa umaabot nilang “Brawl at the Mall: Rise of the Next Champions”, ang wa’y pildeng si Jade Bornea (6-0, 4KOs) sa Sanman gym ug si Raul ‘Vulcan’ Yu (9-1-2, 8KOs) sa ALA Stable dinhi sa Sugbo mag-ilog sa IBF Youth super flyweight title. Mopakita sab sa ilang abilidad sila si Eden ‘Sanman’ Sonsona (35-6-2, 12 KOs), ‘Iron’ Ben Mananquil (12-1-2, 3 KOs) ug Lolito ‘Thunder Shot’ Sonsona (20-1-4, 9KOs).
Si Eden, kanhi WBC International Silver super featherweight champion makigtakus ni Jovany Rota (9-9-0, 6KOs) alang sa World Boxing Federation (WBF) International super featherweight title, samtang ang iyang manghod nga si Lolito Sonsona sa Jason Soong gym makigbinukbukay ni kanhi WBC Euro Asia Pacific ug WBO Asia Pacific flyweight champion Macrea ‘The Barb Wire’ Gandionco (11-4-2, 7KOs) alang sa WBF Asia super flyweight title.
Sa iyang bahin, si Manangquil makigtige ni WBO Asia Pacific bantamweight champion Glenn ‘The Rock’ Porras (29-5-0, 17 KOs) alang sa WBF International bantamweight title. (BANAT NEWS)