CEBU, Philippines - Mikulit sa ilang ikaduhang daog ang Angel Mary Pawnshop human sila makaikyas batok sa Help Group Foundation, 103-101 niadtong Sabado sa 8th F. Llamas Youth Association (FYA) basketball tournament didto sa sitio Mangahan open court sa Barangay Punta Princesa, dakbayan sa Sugbo.
Sa pasiunang duwa, wala makalihok og maayo ang Mikaela human sila tabasa sa D&L Tailoring, 88-81.
Silang Isyot Regudo ug Val Ramirez maoy nangu sa Angel Mary Pawnshop nga nagkumboya’g 41 puntos, samtang ang team owner nga si McLain Alkuino miamot og 11 puntos sa ilang kadaugan.
Unom ka players sa Help Group Foundation ang mibahog og double figures nga gipangulohan ni Toper Marata sa iyang 26 puntos.
Sa sayo pa, si Mac-Mac Encarquez mibahog og 23 puntos aron pangulohan ang D&L Tailoring, gisundan ni Dodong Trangia sa iyang 17 puntos.
Si Shun Cal mihakot og 15 puntos alang sa Mikaela, samtang laing duha ka teammates ang miamot sab og double figures. (BANAT PALARO)