CEBU, Philippines – Ang 2016 nga edisyon sa Sinulog Fun Run gikatkada karong Enero 3 diha sa Cebu City Sports Center.
Bisan og usa lamang kini ka fun run, ang mga tang-an ug idlas nga runners sa Sugbo gipaabot nga mosalmot sa lumba gumikan kay ang Sinulog Foundation migahin man og dul-an sa P60,000 nga ganting salapi ngadto sa mga mananaog.
Ang makampiyon sa men’s ug women’s 5K parehong modawat og P10,000. Ang mopahiluna sa ikaduhang dapit mobulsa og P5,000, samtang ang motapos sa ikatulo hangtod sa ikalimang puwesto modawat og P4,000, P3,000 ug P2,000. Ang maglangkob sa Top 10 hatagan og P1,000 matag usa.
May special awards nga ipanghatag. Ang babaye ug lalaking entrante nga magsul-ot sa labing nindot nga costume modawat og P3,000 matag usa.
Samtang ang labing paspas nga running club ug ingon man grupo nga adunay labing nindot ug makadani nga costume gantihan og P5,000.
Alang sa rehistrasyon ug dugang mga detalye, kadtong mga interesado mahimong motawag sa 253-3700 o 254-5010. Puwede sab silang mo-log on sa www.sinulog.ph. (BANAT NEWS)