CEBU, Philippines – Sila si ALA Boxing Gym fighters Milan 'El Metodico" Melindo ug 'King' Arthur Villanueva pulos nangandam sa usa ka lisud nga sangka batok sa tagsa-tagsa nila ka mga Mehikanong kaatbang sa 'Pinoy Pride 34: Back with a Vengeance' karong Nobiyembre 28 didto sa Hoops Dome sa Barangay Gun-ob sa Lapu-Lapu City.
Napanglantawan ni Melindo (32-2, 12KOs) usa ka lisud nga hagit sa iyang pakigharung ni Carlos 'Divino' Fontes (21-3, 17KOs) diin suwayan niya pagsakmit ang bakanteng WBO International junior flyweight title.
Sa iyang tinguha nga subling mahimong world title contender, ang 27-anyos nga si Melindo nagtuo nga makahatag og dakung hagit kaniya si Fontes aron usab mapakita nga andam na siya nga moaway pagbalik alang sa kalibutanong bakus.
"Taas ako kontra kay 5-foot-9 kuno. Siya na maoy labing taas nakong kontra," matud pa ni Melindo atol sa public workout niadtong miaging gabii didto sa activity center sa SM City Cebu. "Nindot ni kay ma-challenge gyud ko aning awaya ug mapakita gyud nako akong skills."
Sa iyang bahin, si Villanueva (27-1, 14KOs) nangandam alang sa usa ka bell-to-bell nga sinukmagay batok sa Mexican brawler nga si Victor 'Spock' Mendez (19-2, 15KOs) sa iyang tinguha nga masakmit ang WBC International super flyweight belt.
"Kita ko sa video sa iyang away ug kusug sad unya musud sad siya," matud pa ni Villanueva. "Pero salig ko sa akong trainer ug gusto sab ko nga ma-knockout akong kontra." — LPM (BANAT NEWS)