CEBU, Philippines - Gamit ilang kusog nga kinumo ug hait nga mga patid, ang Team Cebu City (TCC) kickboxers mihakot og medalya sa Muay Thai event sa 2015 Philippine National Games (PNG) sa miaging adlaw didto sa San Jose, Antique.
Ang TCC mitapos sa torneyo uban ang lima ka gold, lima ka silver ug upat ka bronze medals.
Gilangkuban sa mga amateur mixed martial arts fighters ug kickboxers nga produkto sa combat grassroots program sa Cebu City Sports Commission, ang TCC mipakita sa ilang kabangis batok sa uban pang mga elite Muay Thai fighters sa nasud.
“Kontento ra ko sa resulta ug proud ko sa team. Nindot ilang gipakita bisan pa og kadaghanan nila mga first timers sa Muay Thai competition,” matud pa ni TCC Muay Thai head coach Mary Ann Durado.
Nangulo sa mga gold medalists sa TCC mao si Rhyle Lugo sa University of San Carlos nga wa’y pilde sa combat tournament. Laing mga gold medalists mao sila si Freska Tejam sa Southwestern University sa girls division, Diosdado Booc ug si Janred Calinao sa University of Cebu nga milabni og duha ka golds sa combat ug Wai Khru events.
Ang Fil-Japanese nga si Yugie Inaba sa UC mihimo usab og double-silver sa juniors division, samtang sila si Roel Rosauro, Julius Muana ug Roy Bajar ang uban pang mihatud og silver medals. Mga bronze medalists sa TCC mao sila si Jedial Alvarez ug Lymil Villacrusis sa UC, Aljun Pepito ug Michael Gabriel Tranquena sa University of the Visayas. (BANAT NEWS)