CEBU, Philippines - Nangayo na sab og overtime ang Park ‘N Go sa wala pa nila masakmit ang daog batok sa CCR Cars, 75-69 sa category C sa TBA-Danny Caballero’s Cup niadtong Domingo didto sa Talisay City Sports Complex.
Ang talagsaong 4-point play ni Michael Arias sa hinapos nga bahin sa overtime maoy naghatag sa Park ‘N Go og 71-67 nga bentaha. Si Arias mao sab ang topscorer sa Park ‘N Go nga mikulit og 15 puntos. Ang team owner nga si Romy Rama ug si Makong Lisondra migaling og 12 puntos matag usa, samtang si Efren Mosqueda mitimbre’g 10 puntos.
Ang CCR Cars ni team owner Epoy ‘The Pistoleros’ Caballero gipangulohan ni Johnson Calub nga miratsada og 14 puntos, gisundan nilang Randy Gavas ug Jords Obrero nga parehong mihandos og 12 puntos ug Jusar Laroa sa iyang 11 puntos.
Segundos na lang unta ang nagdagan aron modaog ang Park ‘N Go human sila molabaw, 62-60, apan si Laroa mipasud sa iyang mahinungdanon nga tira hinungdan sa overtime.
Nakatabla ang CCR Cars, 67-all atol sa overtime, apan si Arias mikompleto sa iyang 4-point play nga maoy dakung factor sa kadaugan sa Park ‘N Go.
Wala hinuon makaduwa tungod sa injury ang leading scorer sa CCR Cars nga si konsehal Danny Caballero nga posible unta makahatag og daog sa koponan.
Sa laing duwa sa division C, ang F/Ges nakaipsot batok sa Joshua sa kulbahinam nilang duwa sa iskor nga 75-73.
Gipangulohan nilang Raul Briones ug Romy Ruales ang kadaugan nga parehong miantog og 14 puntos. Si Gerald Lariego mitikdol og 13 puntos, samtang si Rodney Aquino mitimang og 12 puntos.
Upat sab ka player sa Joshua ang miantog og double figures pinangulohan ni Tomas Abapo nga mihipos og 17 puntos. Si Japet Esmero miantog og 15 puntos, gisundan nilang Onik Gavas ug Alfred Pacabis sa ilang 14 ug 12 puntos.
Sa laing aksiyon, ang Kwarta Padala mihakot na sab og daog, ning higayona batok sa Cavaliers, 96-87 ubos sa category B.
Si Jong Hermosa mikolekta og 28 puntos, samtang sila si Bobot Labuca ug Jao Gabasa miariya’g 20 puntos matag usa ug si Jake Patiluna mikutlo’g 15 puntos.
Nausik ang 32 puntos ni Bongbong Base kay wala makalahutay ang iyang kusog kay walay pahuway gikan sa pagsugod sa duwa.
Si JF Bas mitampo’g 15 puntos, si Jeros Capala miambit og 14 puntos, samtang si Bongbong Pogoy miabuno’g 10 puntos.
Sa legends division, si Lino Valiente miposa’g 16 puntos aron pangulohan ang San Miguel nga mipukan sa Talk ‘N Text, 55-49.
Si Rene Cabrera mitampo’g 12 puntos alang sa San Miguel nga maoy nidominar sa tibuok duwa. Sila si Danny Fernandez ug Joel Cabigas mitimbre’g 10 puntos matag usa.
Si Mar Kong mao sab ang nangu sa Talk ‘N Text sa iyang 12 puntos, gisundan nilang Fred Cabasa ug Romy Basillote nga adunay tag-10 puntos.
Ang TBA Danny Caballero’s Cup giorganisar ni Randy Gavas.