Tillor nangambisyon og korona sa titulo sa milo national finals
CEBU, Philippines - Tungason og pila ka bungtod, apan si Cebuano long-distance runner Noel Tillor nangambisyon paglangkat sa korona sa 39th Milo Marathon National Finals nga gikatakda sa Disyembre didto sa Angeles City sa Pampanga.
Pipila lang ka gutlo human niya gilabang ang ‘finish line’ sa Cebu leg sa Milo Marathon niadtong Domingo, si Tillor mibutyag nga dili niya usikan ang panahon ug mobansay-bansay dayon siya alang sa mas dakung hagit nga nagpaabot kaniya.Ang lumad nga taga-Bogo nga si Tillor, nag-una sa 21K qualifiers sa oras nga 1:13:10 ug mihatag kaniya sa kahigayonan nga morepresentar sa Sugbo sa National Finals libre na ang tanang galastohan sa biyahe.
“Wala kaayo nako gihurot akong kusog pag-Domingo kay ang ako gyud nga tumong ron mao ang podium finish sa National Finals,” matud pa ni Tillor.
Si Tillor wala makontento sa iyang fifth place finish sa local open sa miaging National Finals ug mibahad siya nga buhaton ang tanan aron mapalambo iyang performance ug makuha ang korona sa sunod niyang pagsalmot sa finals.
“Gusto sab ko makahatag og dungog (sa mga Cebuano),” segun ni Tillor. “Kaya ra man ba kun makuha lang nako ang saktong training ug kondisyon sa adlaw na mismo sa lumba.”
Miangkon hinuon si Tillor nga dili sayon ang iyang misyon tungod kay dili siya usa ka full-time runner tungod kay kinahanglan pud niyang atimanon iyang trabaho isip mekaniko.
“Lisud sab kay trabaho ko otso oras unya kapoy na ang lawas pero pangitaan nato na og paagi,” mapahiubsanong namulong si Tillor.
Buot ni Tillor nga sama sa Sugbuanong reigning Milo Marathon queen nga si Mary Joy Tabal, mapakita usab niya ang tinuoray nga katakus sa mga Cebuano sa labing karaan ug usa sa mga labing dakung marathon event sa nasud. (BANAT NEWS)
- Latest
