CEBU, Philippines – Si PBF bantamweight champion Junny ‘The Punisher’ Salogaol sa Big Yellow Stable nga anaa magbasi sa Lagtang, dakbayan sa Talisay moatubang sa labing daku nga hagit sa iyang karera sa labing una sab niyang away sa langyaw nga lapyahan.
Gitaho ni Felman Gingoyon sa philboxing.com nga ang 22-anyos nga si Salogaol gikatakda nga moaway alang sa IBF Pan-Pacific junior featherweight title karong Septiyembre 21 didto sa Bangkok, Thailand. Wala pa hinuon masayri kun kinsa ang iyang kontra gumikan kay wala man maabot sa ilang kampo ang kontrata sa away.
Si matchmaker Christopher ‘Ping-Ping’ Tepora nakatabang og daku aron mahatagan og katumanan ang maong gidamgo nga away ni Salogaol bisan tuod og nagdala sab kini og malisud nga hagit sa iyang pagbiyahe sa nataran sa boksing.
Ubos sa superbisyon sa iyang trainer nga si Jose Cortes, si Salogaol kasamtangan karong nangandam alang sa dakung away nga posibleng mahimo niyang hagdanan sa mas daku pang oportunidad kun ugaling buligan siya sa maayong palad.
Si Salogaol lab-as pang mihaw-as gikan sa impresibong kadaugan pinaagi sa third round knockout batok ni Nicong Calamba sa Agusan del Sur aron pagdepensa sa iyang PBF title sa ikaduhang higayon tulo pa ka semana ang milabay didto sa lungsod sa Minglanilla. (BANAT NEWS)