Bulawanong pagtulon-an gikan ni Sir Dodong

Nipakli og laing panid sa libro sa iyang kinabuhi si Sir Jose ‘Dodong’ R. Gullas, ang tinamod namong chairman sa Banat News ug sa igsoon niining mantalaan nga The Freeman, human nagsaulog sa adlaw niyang natawhan niadtong Domingo, Pebrero 1. Kun madungog ka niya nga mamulong, pormal man o kaswal, dali nimong mabasa nga siya napuno sa kaalam ug kinaadman. Mao nang isip halad nako sa maong espesyal nga okasyon, akong ipaambit kaninyo ang pipila ka mga mahinungdanong leksiyon sa kinabuhi nga akong nakat-onan gikan ni Sir Dodong.

1. IT  TAKE YEARS TO BUILD ONE'S REPUTATION, BUT IT TAKES ONLY A MINUTE FOR ONE PERSON TO DESTROY IT. Usa kini ka pait nga kamaturoan sa kinabuhi. Bisan unsa pa nimo ka maayo, apan kun ikaw dauton na gani sa imong isigkatawo labi na ngadto sa wala masayod sa tinuoray nga ikaw, hayan nga sa kalit lang ikaw mamahimong dautan sa mata sa uban. Apan matud pa ni Sir Dodong nga pangutana niining tanan mao ang pagpadayon sa pagbuhat og kamaayohan ug pagpabilin nga ligdong sa  tanan nimong binuhatan kay sa kinaraan pang panultihon, “you can't put a good man down."

2. WHEN YOU DEAL WITH OTHERS, PUT YOUR  HEART INTO YOUR HANDS. Pagka nindot kaayo sud-ungon aning mga pulong. Ang buot ipasabot ni Sir Dodong nga kun ugaling kita mopakita og panagdait sa atong isigkaingon, kinahanglan nga atong gibuhat kinasing-kasing ug dut sa dughan sa uban. Sama pananglit kun kita mohatag og pagkaon sa usa ka kabus o dili ba makililimos nga atong maagian sa dalan, dili lang nibuhat kita sa ingon aron mabusog ang atong gihatagan. Ato sab nga ipabatyag kaniya nga duna diay laing tawo nga nagpangga ug nagpakabana sa iyang kahimtang. Nindot kaayo kun sa tanan natong pagabuhaton mao kini ang atong sundon.

3. WE LIVE NOT BY EACH HOUR, NOT BY EACH MINUTE NOR EVERY SECOND BUT BY EACH MOMENT OF THE DAY. Buot ipasabot ni Sir Dodong nga dili nato kontrolado ang atong kinabuhi ug nga kita nagpuyo sa matag higayon lamang samtang anaa pa kita niining kalibotana. Dili nato matagna kun unsay mahitabo kanato sa matag adlaw natong pagtikaw-tikaw. Mao nang kun maghisgot kita sa umaabot natong pagabuhaton, mas maayo seguro nga kita mosambit og 'puhon' kon Godwilling kay lagi wa may kaseguroan ang tanan.

4. IT PAYS TO BE HUMBLE, TO BE HUMANE. Kining maong mga pulong gikan ni Sir Dodong mas maayo nga panaminan sa uban natong kaigsuonan labi na kadtong mga  taas na kaayo og tan-aw sa ilang kaugalingon. Tungod sa ilang garbo, makalimot na sila pagpahiubos nga sa kaulahian magtuboy kanila ngadto sa kadautan. Mao nang mas maayo gyud nga isilsil sa kanunay sa atong dughan ang pagkamapahiubsanon kay gawas nga buligan kita sa maayong gasa sa kinabuhi, ang tanan mosumbalik kanato sa pamaagi nga kamaayohan.

5. IN LIFE, WE HAVE A MOMENT TO LAUGH, A MOMENT TO CRY. A MOMENT TO WORK HARD, A MOMENT TO RELAX AND ENJOY. Mao kini ang prinsipyo sa timbangan sa kinabuhi. Patas lang ang atong madangatan tanan bisan unsa pa ang estado nato, pobre man ka o adunahan. Dunay higayon nga ikaw mokatawa, apan duna say mga higayon nga ikaw masubo ug mopatulo og lusak sa luha sa imong mga mata. Dunay panahon nga ikaw mokayod og trabaho, apan duna say panahon nga morelaks ka lang ug dimdimon ang natagamtaman nga kaharuhay bugti sa imong singot ug kahago.

Kining mga bulawanong pagtulon-an nga akong napupo gikan ni Sir Dodong sa kanunay gitipigan nako sa akong dughan ug alimpatakan. Ako kining gipadayag kaninyo dala ang panghinaut nga kini inyo sab kining hinuklogan ug himuon nga sumbanan sa inadlaw ninyong pagpakabuhi ning kalibotan.

Belated happy birthday Sir Dodong ug salamat ning mga tipaka sa makiadmanon nga mga pulong nga nakalamdag dili lamang sa akong huna-huna, apan hasta sab sa tanan kansang kinabuhi imong natandog ug naalima.

Alang sa inyong komentaryo o reaksiyon, mahimong mo-email sa [email protected]