CEBU, Philippines - Masayran na kun kinsa sa Alaska Aces ug Meralco Bolts ang makaangkon og luna sa semifinals sa ilang knockout quarterfinals game karong adlawa sa bugtong duwa sa PBA Philippine Cup didto sa Smart Araneta Coliseum.
Ang duwa sugdan sa alas-5 sa hapon.
Ang modaog maoy moabante sa semis diin ilang sangkaon ang nagpaabot nga Rain or Shine Elasto Painters.
Gipaboran ang Aces tungod sa resulta sa sangka sa duha atol sa elimination phase diin gilubong nila ang Bolts, 105-64 niadtong Oktubre.
Mas gibantayan nila karon ang Bolts ilabi na nga ilang napalagpot ang defending champion Purefoods Star Hotshots sa quarterfinals.
Atngan ang mga krusyal nga match-ups sa maong duwa tali nila ni Calvin Abueva, Cyrus Baguio ug Sonny Thoss sa Alaska ug Cliff Hodge, Jared Dillinger ug Reynel Hugnatan sa Meralco. (BANAT NEWS)