6th Leg sa 2014 MS Motosuit Motocross Series moarangkada karong Domingo didto sa Carcar City
CEBU, Philippines – Magpinuhalay na sab ang mga tang-ang riders dinhi sa Sugbo ug sa ilang mga karibal gikan sa silinganang mga probinsiya sa sixth leg sa 2014 MS Motosuit Motocross Series karong Domingo didto sa Liburon racetrack sa dakbayan sa Carcar.
Ulohan og 5th Mayor Nice Apura Motocross Cup, ang kalihukan usa sa mga highlights sa tinuig nga kapistahan sa Carcar pahinungod sa ilang mahal nga patrona St. Catherine de Alexandria.
“I’m very happy that we are able to reach our target of coming up with six legs for our comeback series this year,” matud pa ni MS Motosuit big boss Lou Ornopia, ang one-time Sportsman of the Year awardee sa Sportswriters Association of Cebu.
Sama sa nangaging mga lumba, ang mga kategoriya nga tigian mao ang mini 60cc ug 85cc, beginners, local enduro, open enduro, executive A, B ug C, novice, intermediate, expert ug ang pro open.
Gipaluyohan sa Carcar City ubos sa liderato ni Mayor Nice Apura, ang lumba gisuportahan sab sa Narra Park Resort of Alcoy, CTM-Media Inc., Jonadel’s Inns and Suites, Canoy’s Canyon Estate, CCSC Construction, Outlast Bikers, Barangay Captain William Racoma, Geraldine Ybañez ug Amy Lauron sa Lauron Air Conditioning. (BANAT NEWS)
- Latest
